有「保險教父」之稱嘅楊梵城，終於落實將其03年9月成立嘅私人公司──先機，出售畀上市公司民豐控股（279），作價5400萬，楊梵城喺呢單交易並無現金落袋，只係換取兩億股民豐新股，相當於持有13.05%民豐。
喺保險業縱橫48年嘅楊梵城，自然「志氣好大」，噚日已經以主人家嘅姿態主持記者會，一起首就話，先機（從事一般及人壽保險代理人業務）係保險嘅靈魂、民豐就係一副軀殼，兩者結合就係「如虎添翼」咁話。
將「靈魂」出售畀民豐之後，楊梵城話先機已經係「過去式」（pasttense），𠵱家開始要講民豐喇。交易完成後，佢會出任董事局主席，但係，根據交易條款，佢要以「餽贈方式」，向先機注入1500萬現金。由於先機開業一年，未有錢賺，不諱言有資金需要嘅教父，唔知會點樣解決呢？
楊梵城嘅夢想，係發展內地市場，進駐民豐後，佢話會以香港為業務基地，計劃出年喺香港申請保險牌照、成立保險業務公司，然後進軍泰國、菲律賓等東南亞市場。佢希望，10年後香港營業代理唔會少過1200人，仲希望5年後能夠成為全港十大（以生意額計算）壽險公司之一。
噚日陪同佢出席記者會嘅，仲有佢嘅囡囡楊蕙茵（Veronica），另一個女Elsa同埋Veronica都會加入民豐管理層。