有冇諗過一間上市公司嘅股票，一股可以值成10萬美金（78萬港元）？
登登登鄧，美國股神畢菲特隻投資旗艦股巴郡（BerkshireHathaway），今個星期一就創咗呢個紀錄，收市報10萬美金，噚日甫開市更升上10.1萬美金，認真厲害。
巴郡前身係一間紡織公司，65年被畢菲特收購咗，然後變成投資旗艦，經過41年，呢間公司已經升值5555倍，市值1.2萬億元，簡直係一個天文數字。雖然巴郡𠵱家每股值成10萬美金，但畢菲特依然拒絕將股份拆細，佢嘅理論係，一隻貴價股可以趕走短炒炒家。
投資者都唔使失望，事關巴郡係有B股嘅，B股等於A股三十分之一，噚日早段報3358美金（2.6萬元）。應該係買得起嘅，以香港市場嚟講，𠵱家一手滙豐控股，都要5.87萬港元啦。