盛傳就快退休嘅警隊一哥李明逵，上月初百忙中抽空北上四川，探訪一班喺當地進行戰術培訓交流嘅香港夥計，認真親民！一哥呢次仲帶埋人事訓練處處長曾偉雄、新界北警區指揮官張肇華、專業發展學習中心高級警司黃國偉，仲有同佢一樣咁高嘅處長私人助理郭柏聰一齊北上交流。
最新一期《警聲》報道，呢個巡迴教學計劃由04年開始，香港警察曾經喺烏魯木齊、蘭州、杭州同福州四個地方舉辦，為332位公安提供槍械等課程訓練。中港兩地警務交流咁頻繁，八方仲記得，今年5月喺互聯網上流傳好多香港警察內部培訓嘅資料，追查之下先發覺係由四川嘅警務機構掟上網。李sir今次深入虎穴，唔知會唔會順便同對方傾吓可以點將敏感資料保密？