後日就係期指結算，但係昨日個市都只係見到「暗鬥」而見唔到「明爭」，前晚美股表現出色，但港股班好友並冇把握機會發難，恒指升63點收市，好友表面係贏咗一仗，之不過個市有暗湧，班淡友似乎正密謀出擊。
個市呢排炒咗上18000樓上，技術上好友佔有優勢，不過，利淡嘅迹象開始增多，早幾日先至有大公司抽水，昨日又傳恒隆集團（010）批股，大股抽水，向來以偏淡消息睇，4月到𠵱家，勾地表冇發過市，前幾日嘉國（173）勾咗幅市區地皮出嚟，個市一啲反應都冇，工行（1398）後日掛牌，昨日又見啲國內銀行股腳軟軟，今年嘅股民honey國壽（2628）都俾人質番落嚟，班大戶係咪趁住工行掛牌派貨，都係要有啲警惕好啲。明日開市前美國嗰邊議息應該已有結果，會後聲明講啲乜嘢都會係舞個市上落嘅藉口，撞啱港股期指結算前夕，睇怕好淡嘅搏擊會明刀明槍，升跌嘅結果對周五個市會有好大影響。
聯通C輪3855：聯通（762）昨收8.29元，前個禮拜升到8.43元現調整，但係跌得好慢，睇啲成交同陰陽燭嘅變化，應該係壓價收貨，昨日上番10日線樓上，收市又話奪得澳門3G牌照，呢兩日應該會上試8.50元，破位睇9元。
聯通C輪3855昨日報收41.5仙，行使價8.50元，輕微價外，對沖值0.47，正股升破8.50元，升幅會吸引，槓桿率20倍（有效9.5倍），仲有66日到期，溢價7.5%，高咗啲，合「速戰速決」嘅炒賣方法，正股升破8.50元後嘅炒賣氣氛會好唔同，「小注」搏殺，正股升上8.50元同埋9元，3855睇51仙同80仙，正股跌穿8.16元或上試8.50元不破沽出計數。
俊樺