阿Jan林海峰又搞棟篤笑，個騷叫做「是但噏踎低噴飯」，今年12月15號喺會展開鑼，噚日仲喺黃埔舉行記者會。大會將成個台同所有布置都用晒金色，又特登整咗個金廁所，畀阿Jan踎喺上面，兼夾醒多個着tubedress嘅金髮美女侍候，遞上愛心飯盒。當阿Jan接過飯盒時，金髮美女即刻烏低身輕輕搭住佢個膊頭，阿Jan好風騷咁話：「喺廁所食飯，仲有埋靚女陪，都唔知可以做啲乜嘢咯？」主持即刻笑佢：「你再係咁返到屋企就會俾人扭耳仔。」
設置超大螢幕
阿Jan話今次開騷場地比上次嘅灣仔伊館大三倍，壓力自然大咗，事關仲要照顧埋坐後面嘅觀眾，阿Jan話：「我哋會預備一個好大嘅螢幕，擔保一定大過補習天王個頭。」問佢今次個騷同去年底搞嘅「林海峰是但噏發花癲」有乜嘢唔同？佢竟然好抵死咁話：「好難講畀你聽，如果要講，就要做一次畀你睇，咁唔講，科水先。」咁即係要等到開騷嗰陣先有答案啦！