根據政府最新公布嘅住宅供應量，截至今年9月，貨尾連同未售樓花數目達到6.5萬戶，係04年有紀錄以來最高。有心水清嘅網友即刻將呢堆數字同發展商近排頻頻減價推貨尾盤扯上關係。
dbp喺《香港討論區》上提出︰「地產商之所以割禾青劈價求售，要錢唔要貨，係因為佢哋比普通市民有先見之明。」
供應斷層疑幻疑真
網友mousehunter就顯得好傷心，質疑市場一直講樓巿有斷層，係咪呃人？誰知ykfp抵死回應佢一句︰「樓巿真係斷層㗎……啲老鬼已死，新血無銀買，咁仲唔係樓巿斷層？」
睇得灰嘅網友更加擔心，再咁搞落去，就算冇董伯伯政策，香港樓市遲早都有8萬5供應量，屆時樓價一定暴跌。
不過，CHATTER就以專家口脗安慰大家，雖則佢自己都相信，有朝一日香港樓市會大跌，但應該唔會係𠵱家，因為大跌市必須有以下嘅誘因︰
1.政治因素，例如政府盲目增加土地供應，形成供過於求；
2.樓價上升至影響民生的地步；
3.利率向上，供樓開支與租金收入脫節；
4.經濟步入下跌周期；
5.嚴重外圍因素，例如金融風暴及戰爭等；
6.全民皆炒，步入瘋狂。
CHATTER仲話，1997年後之所以大跌，係因為以上6項因素都有齊，而今日，6項中的任何一項都未見。
有資深嘅地產代理指出，05年一手樓的確有炒賣過度嘅情況，導致樓價偏高，而之後市況回落，炒家嘅資金被困，結果06年一手樓市銷售好淡靜，發展商就被迫作出調整，出現減價推盤潮。代理預期，今年第4季一手樓市仍然會繼續調整，直至試出支持位，調整先至會結束。