平板電腦（TabletPC）玩咗幾年，毫無起色，售價太貴谷極唔紅。到06年尾卻一反常態，一個月內幾個牌子TabletPC相繼出籠，彷彿鹹魚翻生又再時興，主要原因係近年輕觸屏幕作價大幅下降，連帶TabletPC售價由二萬幾下調到貼近一萬，今日介紹嘅Fujitsu新機除有8.9"屏幕外，更僅重1kg，連女士們都可兩隻手指拎得起！
記者：陸俊雄
攝影：陳盛臣
其實Fujitsu一路都冇放棄過推出TabletPC，久不久便有新機誕生，不過今次主角新機P1610就巴閉啲，香港代理為咗佢專誠搞咗個發布會。咁有信心，全因佢喺輕、細同功能上做到極高平衡，有望打破TabletPC困局死胡同。
大會搵嚟一男一女模特兒，即場換上唔同裝束，代表唔同場合都可用到呢部新機。例如搭飛機旅行或公幹時用、着晒老西返工開會用、再唔係歎茶時Hea住玩都仲得。搞咗咁多花臣，當然引嚟記者朋友們閃光燈閃個不停。
3技術加強屏幕實用性
一睇見P1610個8.9"闊屏（WXGA），直接令人聯想到好似部手提DVD機，或者係PMP機，可想而知佢有幾細部！雖然好多人話電腦嘅嘢內涵緊要過外表，不過喺今日乜都講包裝嘅年代，其實部機單係賣芒、賣纖巧外形，同拎上手嘅超輕感覺，已經吸引到一班經常出街見客嘅用家垂青。
睇番個8.9"闊屏，就好創新地加入一種技術，令室外使用都毋須調光屏幕，已可有效減低反光效果。筆者就測試熄咗P1610背光燈時，畫面的確清番晒，個頭唔使左搖右擺嚟就個畫面。另一特色係P1610可調校埋Windows方向，闊芒下面有個專門將畫面由橫度改為直度嘅按鈕。鍾意睇電子書或寫筆記可將部機打直嚟睇，認真貼心。
好多TabletPC個旋轉芒其實只可作單方向180°轉向，P1610仲可作左右雙面轉向，真正稱得上任扭唔嬲。
軟硬件誇張保護
話明係Fujitsu嘅LifeBook，招牌動作指紋辨認一定唔少得。感應位就設喺芒嘅左手邊，用左手四隻手指扶住機面，手指公放埋去，比起平日壓落鍵盤Pad位個動作，方便自然得多。外面保安嚴密，內裏保護功能亦都做足。P1610仲新增咗3D震動感應器（ShockSensor），當部機受震時，硬碟機頭就會自行調整到安全位置，避免磁頭受損破壞資料。再穩陣啲可設埋密碼鎖，機身受嚴重震盪時個鎖會自行啓動，要輸入密碼至可拎番資料嚟用，保證萬無一失。P1610喺保護工夫方面的確做得好足。
男女用家立場有別
學生哥阿熙：用唔着！
「唔理佢乜嘢牌子，TabletPC本身個構思就係無聊，就係因為手寫扭芒就賣貴普通電腦至少兩千銀。講真，你有幾多機會用個手寫芒呀！打字仲快過佢啦！」
室內設計師阿梁：好齋喎！
「P1610係幾細部，不過細到連部光碟機都冇埋就好唔方便囉。萬一見客嗰陣，對方叫你將啲資料燒落碟畀佢點算？拎多嚿外置咪又係重番晒。」
OL潘小姐：唔怕反光
「咁細部又輕身真係幾吸引，就算賣萬四、五我都會考慮。個芒仲有LCD背光燈，出街用又唔怕反光睇唔到，我成日喺車度用手提電腦就遇到反光情況。」
秘書Ivy：放喺手袋都得
「P1610咁細好啱女仔，方便帶出街，得1kg重放落手袋都仲得。可能女仔手細，打字嘅手感都唔錯，係男人粗手粗腳先覺得咁細部機，打字唔舒服啫！」
PROFILE
處理器：IntelCoreSoloU1400
硬碟：80GB 記憶體：512MBDDR2
顯示屏：8.9"TFT（1,280×768）
顯示卡：IntelGraphicsMediaAccelerator950
電池：持續使用4小時 重量：1kg
體積：232×167×34.5~37mm
查詢：富士通（31012898）