月初，卿姐冧莊做咗財委會主席事件，事後捉鬼風波愈演愈烈，呢四隻反骨鬼到底係邊個，八方當初綜合各方意見，覺得最大嫌疑係泛聯盟除咗行會陳智思之外嘅四個人莫屬，點知，其後無間道嘅疑犯愈來愈多，有李國寶、李鳳英、田北俊、黃宜弘，各有各估，最後仲引發出煲呔針大班與自由黨田大少的撰文罵戰，咁講法認真失禮死人，如果給外國看到香港政黨咁嘅水準，一定笑死。
田少、大班同石禮謙隔空鬧完之後，仲以為事情告一段落，點知最近八方又八到一啲古仔，聽講中聯辦成員最近頻頻出動，問人其他事務意見之餘，仲會問埋信唔信呢單嘢其中一個「鬼頭仔」係唔係寶哥哥？對於整件事又點睇？勢要查出陳鑑林喺財委會主席單嘢點解會臨陣墮馬？
投票問人個「卿」字點寫
嘩嘩嘩，於是又有個陰謀論出嚟，因為寶哥哥同煲呔嘅關係實在太親密，佢既係行政會議成員，舊年又係煲呔嘅競選經理，寶哥哥呢幾年喺政府同立法會內外叱咤風雲，十足十幕後kingmaker，加上呢個煲呔特首，口就話「親疏有別」，私底下民建聯就認為煲呔對佢哋唔夠好，尤其係工聯會，喺最低工資方面，同煲呔撐到衡，搞到大家公然面左左！
寶哥哥最大嘅嫌疑係佢投票當中好問唔問，居然問人卿姐個「卿」字點寫，成為瓜田李下，佢中文一向唔好，又唔肯去學，今日因為一個字搞出個大頭佛嘞。陰謀論認為，呢鑊有可能煲呔主導，佢同李國寶係親密戰友，兩人都唔鍾意民建聯，加上老實講，卿姐份人雖然倀雞，惡到死，但係佢做嘢又幾認真盡責，睇paper好勤力，連啲AO都私下讚有蠱惑都走唔出佢嘅法眼，煲呔見民建聯、工聯會咁唔合作，不如暗地裏跣鑊勁嘅畀陳鑑林歎吓，令佢做財委會主席落空，順勢向卿姐示吓好意，第二時有求於佢時，卿姐向來恩怨分明，梗係識做啦！