曼聯前鋒朗尼終於大個仔啦！噚日（10月24日）佢度過咗21歲生日，朗尼話有大把生日願望，好似希望謝拉特加盟紅魔、考車牌同助養小朋友咁，願望多到數唔晒。朗尼今次生日使咗一大筆錢，不過使嘅唔係佢，而係佢女友高蓮，聽講佢使咗朗尼成十幾萬鎊！
生日願望冇入波份
𠵱家朗尼到咗「成人」嘅21歲年齡，真係咩嘢都可以自己話晒事，朗尼仲話經世盃紅牌一役後已經成長咗。講開朗尼生日嗰日，壽星仔都未買嘢獎勵自己，女友高蓮呢個大花筒就認真犀利，已經買咗30,000鎊嘅名錶、5,000鎊嘅名牌手袋、15,000鎊嘅高爾夫球模擬訓練裝置，直頭當正係自己生日咁。
如果求大俠係高蓮，仲唔嗱嗱臨mark低埋朗尼嘅老竇老母同姨媽姑姐嘅生日，實行喺佢哋生日嗰日即刻大掃貨，橫掂都係朗尼畀錢咋嘛。
朗尼家陣喺國家隊同球會都鬧入球荒，照計生日願望都應該有「入波」份啩？哈！點知朗尼話𠵱家曼聯個勢咁勁，隊中又大把球員可以數糊，自己入唔入波都冇所謂喎。朗尼，你21歲大個仔㗎啦，唔好再靠傑斯叔叔同史高斯叔叔好唔好？
「朗尼啱啱生完日，應該都可以沖喜吓佢近期嘅入球荒頹勢；作為球迷，見到朗尼入番波同成熟咗梗係開心，話晒佢係曼聯同英格蘭嘅未來希望吖。」