中資股近排好多隻都表現省鏡，上唔切車嘅，𠵱家高追真係十分考膽量。與其心驚驚同人高位搶貨，不如向啲仲未起動嘅股份埋手。噚日見網上有人談論銀建國際（171），不如就睇吓隻嘢抵唔抵買。隻股噚日收報2蚊，跌1仙。
「香港討論區」內，leewingkin引述一個專欄嘅分析，指銀建目標價2.8元，佢想知合唔合理？
「1336107」對2.80元目標價有保留，因為隻股喺2蚊樓上積咗太多蟹貨。
tony1298亦對呢隻股冇乜幻想：「最近佢公布嘅業績都唔係好靚。」
「黑個墨斗的豬」見解相近：「你自己諗吓囉，佢主要係收購人哋嘅不良asset，但上次個市旺佢都升唔起，喺around2蚊積咗好多crab。除非有利好消息or有人收到風大手入貨，否則難咗少少。」
惟獨Mel-mel睇得比較正面：「我都有買，OKla。」
銀建主業係提供處置不良資產之顧問服務，另涉及物業投資同證券買賣。集團大股東係隸屬國務院嘅中國信達資產管理，第二大股東係花旗銀行，大股東咁猛料，銀建營運上佔有優勢。
間公司上個月初公布中期業績，純利倒退6.3%，股價由2.10元樓上向下插，今個月最低見1.84元，係04年8月中以嚟低位，MACD雙底大背馳反彈，前日最高見2.06元。隻股近呢幾日反彈時，成交明顯增加，MACD線已重上0線之上，一旦連訊號線亦重越0線，就可確認雙牛訊號。如果短線見1.97元，可小注博反彈，先睇2.15元穿唔穿，升穿睇2.30元，短炒以1.90元作止蝕。
余文