北泰（2339）日前宣布，與全球汽車零部件企業DelphiTechnologies.（德爾福）達成技術合作協議，北泰將獲得德爾福所有的磨擦材料配方和技術，德爾福亦將為北泰提供生產工藝的改良和人員培訓，並提升整體生產技術。受到消息刺激，北泰股價一度急升18%，收市升13.9%。
呢間Delphi來頭唔簡單，係世界最大汽車零部件生產商，以前係通用汽車旗下附屬，但亦都係呢間公司搞到通用周身蟻，舊年主動申請破產保護，上周四才進行一次破產聆訊。最新消息，Delphi正被數家大型收購公司、私人基金及對沖基金爭購，涉資130億至140億美元。
北泰一向有大行睇開，兼有唔少基金股東，例如PMA同埋Sansar等等，不過基金都試過中伏，今年4月公司以每股3.625元配股集資6億幾，即日跌穿配股價之餘，仲要一路無反彈，跌到去8月兩個四毫幾，接貨嘅基金要輸成蚊幾。
德銀睇2.5元
同樣有做汽車零件，又同Delphi有關係嘅公司仲有一間，叫IPE集團（929），咁啱佢喺4月又配過一次股，以每股1.87元配售1.2億股，亦係跌至8月才見底，低見1.16元。公司生產高密金屬零件，主要製造電腦硬盤（HDD）零件及汽車液壓設備零件兩大類。汽車零件業務方面，去年已獲SiemensVDO、Bosch、Delphi及TRW等大企業接納為合資格供應商，並取得多份3至5年嘅長期供應商合約。IPE較冷門，成交疏落，年初獲德銀出報告睇好，目標價2.5元。追唔切北泰，呢隻不妨望番兩眼。
歐陽風