鄉議局噚日慶祝成立80周年，話晒鄉議局喺選委會都有成21票，煲呔梗係要拉埋成棚官嚟捧場啦！唔知係咪嫌燊哥捐錢捐得唔夠、定係重官輕商呢，大會司儀叫咗好多高官同有頭有面人士上台、淨係冇叫到燊哥，搞到燊哥面黑黑咁走。
鄉議局好齊人，但搵嚟搵去都唔見非法盤踞觀音山嘅香灼璣。上屆香灼璣係選委，但僧多粥少、個個都想做選委，睇怕鄉議局都未必畀璣哥冧莊，但發叔都算大方，話違佔官地唔係乜嘢大罪，絕對唔會影響璣哥參選資格，唔應該咁樣就誅九族，乜都唔畀佢選喎！
個個界別嘅選委都競爭激烈，被指有份協調選舉嘅夏佳理就話，唔會去選法律界，亦冇人搵佢去選。