意甲聯周三加開快車，當大家季初以為意甲冠軍不離國米、羅馬同AC3隊，不過原來巴勒莫已經唔聲唔聲攀上榜首；今仗巴勒莫主場對墨西拿，唔好以為主隊勝望壓一，唔考慮「西西里島」因素，蝕底只係自己，有線揀嚟直播，一於提早推介畀大家。文：藍鑽石
西西里島係意大利第1大島，地形上，意大利本土就似對靴，西西里島就似靴踢住個波咁。不過西西里島出名嘅並唔係踢波，而係「黑手黨」；「黑手黨」起源於西西里島，是歷史悠久的地下犯罪組織，電影《教父》就係講「黑手黨」。我唔敢講位於西西里首府巴勒莫市嘅儍豹兵團，同「黑手黨」有咩連繫，不過巴勒莫今季大事擴軍，「邪氣」作風都依然改唔到。
巴勒莫今季真係好有雄心，好想喺聯賽同歐協盃創一番功業，包括收購比斯安奴、森比斯奧及阿馬利等外援，連同薩卡度、卡拉斯奧路及廸米捷利等土炮，論實力真係有中上游級數。
不過唔知係唔係班費貴咗，要喺「第二啲地方」搵食，今季戰果一啲都唔正路；之前兩次主場對同屬南部嘅球會，已經有唔尋常戰果，包括領先3球下，僅勝里賈納4:3，對同屬西西里島嘅卡坦尼亞，就下半場入4粒，贏5:3，又係開主其他波膽；之前嗰場聯賽，主場又以2:3輸畀「升班馬」阿蘭特大，真係輸死人。
今次巴勒莫挾爆大冷贏AC米蘭餘威而臨，主場出擊，連「牛頭角順嫂」都識話巴勒莫W梗，你識諗，莊家同埋「黑」朋友又點會唔識諗呢？
巴勒莫咪亂追寶尾
講真，屬於西西里島第3大城市嘅墨西拿，牌面一定唔及得主隊，上仗兩度領先都可以俾安玻里迫和。不過墨西拿話晒有前祖記後衞祖利安奴坐鎮後防，中場又有日本國腳小笠原滿男，前鋒列根奴勝在步大力雄；今仗屬於打吡戰身份，加上又係巴勒莫近8日第3場賽事，有晒藉口贏唔到；今仗一定博墨西拿「客勝」，兼博雙方「黑手」言和，呀，唔係，係握手言和先真。
敲伯明翰劈「錫」開冷W
冷門方面，博伯明翰喺聯賽盃作客擊敗錫菲聯；錫菲聯表面上高對手一級，不過事實係錫菲聯今季先升上英超，伯明翰今季先降落英冠，實力差距一啲都唔大；而且錫菲聯護級要緊，今屆聯賽唯一勝仗，都係米杜士堡送畀佢哋啫。錫菲聯𠵱家水深火熱，邊有心情再開闢戰線；伯明翰上仗已經作客擊敗打吡郡，開始復蘇中，呢個3.4倍冷W唔好放過。
投資特攻隊金句
我唔敢講位於西西里首府巴勒莫市嘅儍豹兵團，同黑手黨有咩連繫，不過巴勒莫今季大事擴軍，戰績依然飄忽，「邪氣」難改。