舊年9月，香港多咗個米老鼠樂園，同本土超過20年歷史嘅海洋公園嚟個正面交鋒，觀乎剛過去嗰個黃金周，似乎本土出品略勝一籌，唔單止入場人次拋離米老鼠，噚日仲喺第21屆HKMA/TVB傑出市場策劃獎橫掃各大獎項，勇奪4個大獎，包括市場策劃獎金獎、最具創意獎、優異電視推廣策劃獎，同埋最佳演繹獎，絕對唔係分豬肉人人有份嗰隻。
頒獎典禮都未開始，嘉賓之一嘅HKMA主席李國寶，同海洋公園主席盛智文出雙入對，成對孖公仔咁，就連記者問佢加息問題，佢都指住盛智文話：「問佢啦！」搞到記者一時間唔知點應佢好。兩個成晚雞啄唔斷，唔通寶哥哥想同佢傾將海洋公園搞上市，揮低米老鼠？