第4季焦點新盤之一嘅荔枝角曼克頓山，最近在網上引起不少話題。近日發展商新地頻頻向傳媒吹風，該盤入場費7000蚊呎；四房單位意向呎價8000至萬2蚊；而五房四套房嘅特色單位更吹到萬8蚊呎。另一方面，發展商更搞到要買家面試，製造唔少聲勢。
近日有網民喺《Uwantsforum》發起投票，討論曼克頓山嘅造價合唔合理，結果有75%嘅投票者認為「非常不合理」，仲話就算5000蚊呎都唔值。
rwin話︰「講真我唔覺美孚區值7000蚊呎囉！如果我無車，有錢都寧願揀九龍或奧運站啲海景單位，唔會揀美孚；有車嘅話，就揀何文田或者筆架山啦！」
唱高開低慣常手法
《香港討論區》嘅Queen_Victoria亦都咁講︰「我喺真正嗰個美國帝國金融中心紐約曼克頓上城豪宅區買，都唔使咁貴！香港?Come'on......」
在熱烈嘅討論當中，網友s0350295和fwho就似乎睇得比較通透，前者認為「佢哋都係想好似賣凱旋門咁引起全城哄動......引起話題啫！」後者就估計係新地慣常用嘅「唱高開低」賣樓手法。
資深地產代理相信，曼克頓山開7000蚊呎應該冇乜可能，估計賣6000蚊呎就比較合理，不過，去唔去到貨，就要拭目以待。
買家面試純粹試價
至於買家面試呢樣嘢，《香港討論區》網友Mbtung就直指：「究竟係甚麼道理，又是造市！可能要求買家測驗考試，大家記得要溫習功課呀！」
Ryan_cps附和地說：「唔知道市面有沒有類似嘅模擬面試班及模擬試題？可能遲啲仲要做埋身體檢查。」
Abcpqr更話，遲啲買樓可能仲要對八字，睇睇會唔會同地產商相沖。
網友Easyheart則認為，「面試只是為了試價，面試前代理已通知買家大約樓價，反應好就會開高價，反應差就低開。」