肥姐沈殿霞留院數月，久唔久就傳佢病危，前晚中、港、台三地傳媒都收到誤傳嘅肥姐死訊，馮仁昭追查下，應該係內地有電台收錯消息。肥姐愛女欣宜前日冇去醫院，噚日傍晚終於出現，佢話：「唔知點解傳出咁嘅消息，等我探完媽咪再講啦，我今日仲帶咗燒肉畀媽咪食呀。」佢仲話前一日要開工至冇探媽咪。欣宜逗留咗兩個鐘就走，問到肥姐身體情況，欣宜話：「我想等佢自己交代，希望11月初出到院。」
