自從煲呔話冇積極不干預呢回事之後，引起外國好多關注，經濟學泰斗佛利民都忍唔住孖叉；行會召集人梁振英又差多腳埋嚟，批評港英嘅積極不干預，連消帶打片埋當年做財爺嘅曾蔭權，香港𠵱家仲係唔係大市場小政府，真係惹人疑問。
但祖國就好支持煲呔咁做，噚日出版嘅中銀經濟月刊甚至嫌政府使唔夠錢投資，應該再使多啲錢搞基建，咁樣先可帶動經濟增長喎。中銀話，𠵱家香港公共開支只係佔GDP18.2%，以唔超過兩成做標準，即係話政府仲有260億可以使，𠵱家財政好轉，絕對有條件大搞基建，如果港珠澳大橋、西九龍、郵輪碼頭、物流園同十號碼頭全部去馬，規模同效果肯定唔輸畀港英嘅玫瑰園計劃！