星級推介：寸爆吳文忻　用海膽啷口

喂，用海膽啷口？寸咗啲喎，吳文忻寸都係咁話：「慣咗喎，食親日本菜，我一開始必食一客海膽啷口，埋單前整多客，唔飲水就走，我太鍾意海膽留喺口裏面嗰陣味。」你可以話佢怪，但賣成$60件嘅新鮮海膽確實味濃，咁貴，我都想怪埋一份呀。
記者：蘇振鵬
攝影：伍慶泉

■除刺身外，吳文忻鍾意邊飲Sake邊同朋友傾偈。

■文忻對於刺身情有獨鍾，邊種刺身都唔會放過。

刺身少食多滋味

吳文忻勁Buy刺身：「我Like海鮮，乜刺身都食，海膽、拖羅……唔，好味好味，食自助餐一定狂食生蠔、翡翠螺，唔，諗起都覺得好味。」揀至愛，始終首選海膽，佢仲有個唔知算好定壞嘅怪習慣：「海膽係刺身極品，每次食日本菜，我會先嚟一客海膽壽司啷口，臨走叫多客，𡁻完，唔飲水就閃……我實在太鍾意海膽留喺口裏面嗰陣味。」食咁多海膽會唔會好膩？「都會㗎，所以唔食得多，刺身我最多食到兩板，連飯食，最多食6件左右，少食多滋味。食太多刺身，個胃無啲熱嘢暖住，好似有啲若有所失，所以臨走叫海膽前，會食客稻庭烏冬，之後再食埋海膽走就Perfect喇。」
我食過一次海膽，可能唔新鮮，好難食，之後怕怕。吳文忻都認同海膽新鮮最緊要：「海膽一唔新鮮，味道就會好怪。所以我嚟嚟去去都係幫襯嗰幾間日本餐廳，『大亞味』係其中一間。」「大亞味」喺灣仔區好響朵，以前做私房菜，𠵱家變身日本料理餐廳，大廚輝哥同平哥，曾經喺「金田中」做過師傅，輝哥話：「我都保留番以前私房菜雪、月、花等特色套餐，老闆做開日本食品批發，所以呢度嘅高價日本菜，價錢比出面平。」

海膽壽司每件$60

大路壽司，製法無乜特別，但料就好足，海膽夠大嚿又亁身。輝哥教路：「海膽最靚係5至7月當造嘅馬糞膽，以亁身、層次分明為上品，雖然𠵱家唔係當造，但我哋兩日就由日本來貨一次，保證新鮮。」哦，新鮮，又唔怕食呀。