捍衞基層住屋聯盟嘅成員同孫公堪稱係歡喜寃家，次次碰面都例必擦出火花。噚日佢哋就趁孫公到新伊館出席孔誕活動，帶埋孫公圖像同一副假牙到場贈興，班居民來勢洶洶，孫公又點敢同佢哋正面硬撼，所以最後只係肯安排一名聯盟成員到停車場遞交請願信。
活動搞手區先生同八方講，佢哋特登預備副假牙送畀孫公，係諷刺佢冇口齒。事緣喺1月初時，孫公答應過同居民開會討論公屋租金政策最終爽約，單嘢激到班居民生蝦咁跳，趁孫公出席租金諮詢會時圍堵佢嘅座駕。講番噚日嘅請願，班居民原來唔只唔妥孫公，仲燒埋煲呔嗰叠，事關班居民多次透過特首辦約孫公，但係都冇音信，所以就希望噚日當面約見，不過睇嚟佢哋同孫公嘅約會都係遙遙無期囉。