中環呢個石屎森林，原來都有文化綠洲！由於上年慶祝AIGTower開幕嘅音樂表演反應熱烈，今年捲土重來，由噚日開始一連五日，下晝1點喺AIGTower有AIG同港樂合辦嘅「AIG和諧音樂午間音樂會」。
成個星期，最吸引嘅就係星期五嗰場，香港管弦樂團新任團長夏定忠（JohnHarding），同第一副團長梁建楓會一齊合奏巴赫《雙提琴協奏曲》，兩大高手合作已經夠矚目，其中一個小提琴，仲係超過300年歷史、價值高達450萬美金嘅古董，呢個音樂會免費嘅，當去睇吓古董都抵。
今次表演嘅港樂，樂手較平時少三分之一，不過一樣交足功課，在場逾400聽眾都聽出耳油，絕不比平日遜色。
華華初時諗，應該淨係得中環班老外有興趣，點知喺現場見到聽眾層面極廣，既有印度西施，又有本地OL，甚至連手抱小朋友都有──而且靜靜地聽唔扭計，睇嚟，下年應該仲有機會搞喎。
梁鑑章攝