國泰航空做咗一件好有財經feel嘅善事，因為唔係捐錢，而係捐股票，仲要係一間就快被私有化嘅上市公司──中航興業嘅股票。若果落實私有化，呢批股票總值1.81億元，71間中港同亞洲慈善機構平均分嘅話，每間分到255萬元。
成件事要由國泰今年6月宣布買起港龍航空講起，事關國泰買起港龍之外，仲增持港龍前阿媽中國國際航空嘅股權，國航又入股國泰，加強互控關係。國航然後將原本揸住港龍嘅中航興業私有化，每股私有化作價2.8元。
國泰因為揸多咗國航，而揸咗6470萬股中航興業，根據香港收購及合併守則，國泰唔可以就私有化中航興業行使投票權，並須將呢批股份捐畀慈善機構。國泰行政總裁陳南祿話，雖然喺交易過程中遇到法規問題，但最終搵到令各方滿意嘅解決方案。
71間慈善機構受惠
國泰揀出嚟嘅71間慈善機構遍及各個範疇，包括服務弱勢社群、兒童、長者、殘障、智障、藝術、教育、環保等等，基本上你講得出嘅都有，包括母親的抉擇、愛滋寧養服務協會、癌症基金會、世界自然基金會、紅十字會、公益金，連香港國際電影節協會同香港芭蕾舞團都有，認真係樂善好施。