隨着工行就快上市，網友開始將視線轉去搵其他新目標。好似傳緊話下個月招股集資2至3億嘅安莉芳，one_comment認為佢喺中國會有市場，但要睇佢集資啲錢用嚟做乜。simon7112就話呢隻係師奶愛股，實升！而網友nala2估計，招股嗰陣應該會有胸圍送；胸毛一人更加估係會以「圍」代息呢！
發掘新機遇之餘，網友亦毋忘講吓啲舊股，好似噚日公布業績嘅品質國際咁，網友「小時前」形容係「……有啲等處斬……舊年有物業重估虧損，有一次性撇賬，希望今年核心業務唔好虧損就好，如果唔係，我都要食多嚿雞髀……等佢講時辰到！」mk_1990就比較直接，佢淨係話係「垃圾股……」
另外，大家又提到即將響萬聖節公布業績的中芯。nala2認為中芯業績睇嚟都係令人失望㗎嘞……佢真係可以叫做電訊代fall2號！haha13就話，「無期望又點會有失望呢???」
唔知由IPO持有到𠵱家嗰班「忠心」粉絲又點睇呢？