政府呢期對阿牛同長毛等人成立嘅民間電台真係窮追猛打，早喺8月29號，佢哋已經直踩民間電台設於柴灣嘅辦事處，實行封舖拉人。結果嚟到噚日，電訊管理局正式發出聲明，話正式檢控民間電台同埋一名人士無牌設置無線電設施，另外三名人士就被控無牌使用無線電通訊器具。
如無意外，被控人士肯定有阿牛份，長毛或者都走唔甩。唔知係有心安排定係真係咁啱得咁蹺啦，呢段時間兩位當事人都出發去緊釣魚台喎，根本好難回應呢件事，電訊管理局就咁逃過咗被佢哋大鬧嘅一劫，係咪好好多先？而且案件11月17號喺東區裁判法院審理，阿牛同長毛呢排就忙住保釣，睇嚟電管局同事都覺得拉人同告人啲時機都幾好啩。