孫柏文聽到，啱啱新鮮出爐嘅諾貝爾和平獎得獎者，呢幾日來都係喺度神州遊。攞到獎去遊山玩水，都係件好事，我相信他朝孫柏文憑隻金手指攞到諾貝爾和平獎嘅時候，我都會去「布吉」行吓，不過為避會太心散，我只會去深圳嗰個「布吉」。如果要刺激啲去泰國嘅「布吉」，就要等孫柏文贏得諾貝爾經濟獎時，先至會去。大家可能會話：「咁孫柏文咪一世都冇機會去布吉玩？哈、哈！」
大家千祈唔好咁老定，覺得我一世去唔到布吉玩，因為睇番今屆和平獎得獎者－－孟加拉嘅「尤努斯」MuhammadYunus，諾貝爾獎評審委員會都係覺得佢搞出來嗰間，提供非常細額信貸嘅「鄉村銀行」（孟加拉話叫GrameenBank），好成功咁幫孟加拉人民脫貧，所以就畀咗個和平獎佢，當是鼓勵。
講真，每個讀過幾堂經濟學嘅朋友，都知任何想富起來嘅社會，都需要個「運作中」嘅信貸融資系統。所謂「運作中」，就等如讓需要資金嘅人，可以借到錢，有多餘資金嘅人，可以借錢畀人收利息。所以設計一個信貸融資系統，聽落好似好容易，不過任何信貸融資系統都面對同一個問題，呢個問題就係，點樣令到借咗錢嘅人還錢。因為如果借咗錢嘅人唔還，債主又冇辦法追債，有多餘資金嘅人又點會再肯借錢畀人？
只做女人生意
一般來說，如果地權畫得清楚，有地嘅人就可以好容易借錢，因為債主知道債仔唔還，就可以收地，情況就好似我哋特區「有磚頭就可以借錢」一樣。不過，喺孟加拉啲窮鄉僻壤，地權畫得唔清楚，呢個融資渠道就唔可行，到債仔走數唔還錢嘅時候，債主吹佢唔脹。
諾獎評審會覺得「尤努斯」勁嘅地方，就係佢「發現」咗個方法，可以喺債仔冇資產嘅情況之下，都會盡量還錢。「尤努斯」令到債仔盡量還錢嘅方法其實好簡單，就係要求每個需要資金嘅人，必須同三個「行俠仗義」嘅朋友一齊去「鄉村銀行」，先至可以借到錢。如果原本嘅債仔走數，其他三個人就要還，所以會令到呢三位朋友「睇實」個債仔，債仔就會受到「社群壓力」。仲有，「鄉村銀行」只係做女人生意，因為信用好似好啲，男人想借錢就要諗其他方法。「尤努斯」就係用呢啲咁簡單嘅方法，令到還款率超過90%。
不過，利用「社群壓力」做信貸融資系統「迫還錢」嘅動力，令到一個社會可以有經濟增長，孟加拉絕對唔係第一個。其實，如果大家可以睇吓我哋特區，以前係非常流行一種叫「做會」嘅融資系統，「迫還錢」嘅動力一樣來自「社群壓力」，經過多年來運作，亦尚算成功。所以如果呢個搞「鄉村銀行」嘅「尤努斯」都可以攞和平獎，咁多年來幫咗無數有需要姊妹「做個會」嘅牛頭角順嫂，都應該攞獎！今日，我知道好多後生仔女fan屎，唔識乜嘢叫「做會」，所以聽日我會解釋「做會」呢個融資渠道嘅運作。