本港保釣人士乘坐「保釣二號」出發到釣魚台宣示主權，噚日第二日行程已經開始難捱，船上嘅人同八方講，雖然今次「保釣二號」已經比一號大隻，但一出公海之後，風浪真係好大，有人都頂唔順嘔到七彩，到噚日下晝三點到達廈門，佢哋先可以稍事休息同香港聯絡。離開廈門後，無論係八方定香港保釣成員，已經無辦法同「保釣二號」聯絡。
保釣行動委員會發言人古桂耀話，佢哋噚晚收到天氣預測，廈門、福建一帶海域天氣極之惡劣，相信令船上衞星通訊失靈，由於「保釣二號」船身夠大，暫時唔擔心佢哋安全問題，按原訂計劃，「保釣二號」今日會駛入台灣海峽。
中國外交部噚日已提醒日本政府，唔可以做任何危害保釣人士及船隻安全嘅事，但係日本內閣官房長官鹽崎恭久話明，海上保安廳一定會用船隻驅趕保釣人士，八方希望「保釣二號」安安全全喇！