呢排港式A貨學券制十分惹火，肇因就係教統局管制成性，唔管唔過癮，話一啲私立牟利幼稚園唔達標喎，其實私立非牟利幼稚園都唔係全部達標啫，何況甚麼是「標」，可以拗餐死。
校監T幾十年來辦私校，對官方視學人員全無好感。佢有好多古老故事講，如白頭宮女說玄宗，聽落有癮。佢對左丁山講：「六十年代，視學官高高在上，私校校長一收到去教署見視學官通知，有得震冇得瞓，會見之日，晨早穿着整齊西裝，九點正上到教育署，坐在外面等，等到十點幾，我同幾位私校校長見到啲視學官行嚟行去，但對我哋就視而不見。等到中午，有人來傳話，視學官出咗去食午飯，你哋下晝再嚟。兩點鐘，我哋又坐晒喺度，坐到五點，有人傳話，視學官開會趕唔切，你哋聽朝再嚟。第二朝我又去等咗兩個鐘頭，獲得召見，視學官對我冷冷地講，你間學校呢封公函寫錯幾個字，用詞不當，返去改過，再寄番嚟。我睇真啲，冇錯字吖，只係有啲駁嘴成份啫，但不怕官，最怕管，唯有忍氣吞聲，靜靜哋退下。」
嘩，咁委屈？以前啲視學官真係好威風噃，與今天的「你的公僕」不可同日而語。校監T又講：「當年大量內地難民學生來港，官校無法應付，津貼學校亦不多，於是教署推動私人辦學，我哋可以先租地方開學校收生，先至補辦註冊，好快就手續辦妥。後來官校津校多咗，就當我哋私校係野雞學店，管制多多，將啲私立中學摧殘至死，嗱，馬時亨間母校新法書院咪係當年著名私校囉，捱到𠵱家咪要執笠。我哋辦私校變成港英利用嘅工具，用完就如秋後扇。回歸之後，政府教統局態度同樣橫蠻，私校教育好似趙丹咁講，管得太死沒希望。」
估唔到校監T一把年紀，竟然對教署/教統局滿懷怨憤，至今未消。余生也晚，唔識當年教育署之巴閉法，只記得自己讀私校，老師每逢有視學官到，就會教書教到口震震。