確利達（1224）噚日10點幾出咗份長達283頁嘅收購通函，要睇晒成份通函不但花精神，仲好花時間，唔知係咪呢個原因，噚日確利達高開0.38元之後，橫行咗成朝，到12點左右等啲投資者睇完成份通函，先至開波掃穿0.4元，下午最高衝上0.44元，收0.415元，大升12%。
有關今次收購重慶11幅地及其他物業嘅交易，重要內容基本上已於上月嘅復牌公告披露晒，至於交易完成後對於兩間公司業績嘅影響，則於上周五份通告講咗，確利達今年上半年備考溢利會由約3684萬元增至9.11億元，母公司渝港國際（613）同期備考溢利則由1.38億元增至11.82億元，主要來自被視作出售附屬公司收益。
呢份通函咁長，部份原因係用咗唔少篇幅去介紹重慶房地產市場過去幾年發展，當地經濟增長、房產價格指標等，另介紹地皮位處嘅渝北區未來發展、規劃等等。
配股傳基金接晒
傳聞今次確利達配股畀基金接晒，而股份有半年禁售期，上周公司請咗班「芬佬」上重慶實地考察，據講芬佬對當地城市發展及項目規模相當滿意，下一步公司計劃邀請傳媒作實地考察。
高信集團（007）原本做開金融經紀業務，近年積極轉型搞能源業務，繼收購一家跨國公司開發埃及油田後，月初表示正考慮收購一家駐澳洲嘅石油及氣體公司股份，市場消息指有關收購已屆最後細節階段，可望於短期內落實。
歐陽風