民主黨早排啲電腦俾人入侵，中委會議程俾人傳到周街都係，結果要搵電腦高人返嚟睇過晒啲電腦，點知話口未完，上個禮拜好多民主派中人，又收到一份以民主黨同公民黨名義發出嘅電郵，內容係民主派會計界選委會選舉部署，好多人睇到呢份嘢都打個突，有乜理由連呢啲嘢都可以漏出街先？
八方問過民主黨中人，呢份嘢究竟有幾真先？據知收到份嘢嘅民主黨中人，曾經搵過負責呢個界別選舉統籌嘅譚香文助手了解，初步睇過份嘢，應該係流嘢，所以佢哋唔擔心，覺得成份嘢應該係有人作出嚟嘅惡作劇，所以唔使理佢咁話。
不過聽聞有啲收到呢份文件嘅公民黨中人，佢哋又唔係咁睇法。其中一個公民黨人話，文件入面嘅嘢，雖然唔算係乜機密，但係入面提及選情分析、如何接觸選民部署等，的確與某次內部討論會計界選委會選舉部署極之相似，直情好似係當日會議講稿咁，若然呢份文件係老作出嚟，作呢份文件嘅人好明顯有參加過嗰次會議，將會議內容變成文字，咁即係話公民黨、民主黨入面有內鬼，將內部討論包裝吓就放出街。
「國家級」高手防不勝防
呢個公民黨中人話，今次算好彩嘅係，文件入面冇提及民主黨喺會計界選委參選名單，呢份嘢先係最機密，事實上北京唔少「中間人」，都諗盡方法想起民主派成份選委參選名單，但係民主派死都唔肯講，就算迫於情面，要應酬呢班「中間人」，都係求其講三幾個係人都知會出嚟選嘅人，交差了事。至於兩大黨秘密部署新秀，諗住借選委會機會，進軍政圈的「秘密武器」，就梗係打死都唔講，據知呢班人好多係業界年輕精英，有學歷（聽聞唔少係英美名牌大學畢業），又有資歷（唔少係業界年輕才俊），暫時唔公開佢哋個名、又或者同民主派關係，就係怕北京使橫手，迫佢哋唔好出嚟選，所以先咁鬼秘密。
話選委會選舉安排被外洩，唔理真假，民主派都要加強「保安」，據知一切機密材料，民主黨就盡量唔用未做過保安檢查嘅電腦搞，公民黨就只會喺一部唔可以上網嘅電腦處理，成份選委會參選名單，更加只有小數兩黨高層知，其他人只知同佢哋相關界別人選。不過，話得說回來，正如民主黨中人同八方講，當日同佢哋檢查電腦個高人已經話，若然係「國家級」高手要入侵佢哋電腦，只要喺佢哋附近租個單位，加一兩部儀器，已經可以乜都睇晒，根本防不勝防！