剛過去嘅超級星期天，相信必能令好多波友如癡如醉，其實大賽買多幾注，實在是正常不過嘅事情，不過賽前形勢平均，好睇未必好賭；總不如買阿仙奴對住突變軟腳蟹嘅雷丁，一開波即刻收錢，睇得開心贏得開懷。
唔知波友有冇發覺，呢兩日大賽強撼強賽事絕少和波出現（僅冇乜人理會嘅葡超士砵亭和波圖），反而大炒波膽卻唔少。今天我正想講這個話題；形勢緊湊，莊家開出盤路亦然，對賽賠率不會太懸殊，但從為賭波而睇波角度出發，買和局實在冇癮。一方入波，你又要希望佢哋不要再入；去到下半場中段，仍是膠着狀態，你又要望兩邊都唔好入，咁痛苦，何必呢？
翻查歐洲主要聯賽主客和數據，就算牛頭角順嫂都知道意甲興開和局這數據，但結果係今季踢了接近兩成賽事，和局只佔約34%，竟然比德甲還少，而英超及西甲則分別只有約26%及23%；而且意甲唔少賽事，莊家都調低和局賠率至2.8-2.9倍，所以長買意甲和局，連得個桔都未必有。我只覺得若然大家仍鍾情買和局，最好咪睇直播，等完場收錢。賭波同做人一樣，要有原則有立場！
聯賽盃吼李城克魯
周中意甲主打，個人興趣不大；反而16場聯賽盃值得研究，若大家係「夜鬼」一族，在投注前應上網睇公布陣容，報紙有先天缺陷，難以準確報道這類騎呢盃賽的出場陣容，所以要隔夜前知道阿仙奴明晨作客西布朗嘅正選陣容，難度頗高，惟有開賽前上網核實最有保障。感覺上，莊家明知超聯球隊多派副選上陣，但開出賠率仍然偏熱，初步提供，李斯特城串克魯「主勝」2串1，會愈買愈冷，可睇定嚟食。文:蘋果波神