投資銀行可以話係金融業最高增值工種嘅代表，因此，每年能夠考入呢啲所謂i-bank嘅本港大學畢業生，寥寥無幾。
財經界人力資源諮詢委員會主席陳子政好坦白咁講，香港喺呢方面人才不足，仲要expatriate，即係仍要依賴海外輸入人才，因為香港大學生喺創意、溝通能力同國際視野等方面，仍然不及海外名牌大學畢業生。
長遠嚟講，陳子政認為，業界仍然要透過適當培訓，同埋與本地大學合作，加強培訓更多本地人才做呢類高增值行業，先至可以「不求人」。
聽講，除咗花旗銀行之外，今年瑞銀又開始咗佢哋嘅尖子培訓計劃，今年會提供20多個名額，畀理大嘅二年班同三年班參加，包括培訓同實習機會。華華估計，呢類計劃對佢哋第日考入瑞銀會有幫助。