港股衝上18000大關，已有7個交易日，噚日再創出日中新高18170後，繼續整固，收市跌23點，大藍籌同大國企進入消化期，細價股會接力而上。
上升股（唔計認股證）有330隻，呢個月推介嘅股仔，有好多都好勁。9月底推介光大國際（257），當時股價0.86元，睇1.05元，噚日最高去到1.16元，超額完成。
3個禮拜前，介紹浩倫（1073），當時股價0.57元，噚日最高0.88元，升幅54%。浩倫今日派成績表，如對辦，仲有得上。
兩個禮拜前，話確利達（1224）大變身，當時股價0.385元，睇0.52元，噚日最高上到0.44元。確利達下月6日開股東會，收購同發股落實後，股價升勢會注入新動力。
仲有華基光電（155），月初推介時股價0.65元，初步睇0.90元，噚日最高見0.80元，可繼續上移止賺位，等目標價回吐。
創富（340）繼續創富（創造財富），高收1.70元，大升15.6%，明日開股東會，通過收購同發股應冇問題，幕後人好有信心，睇勢呢次有好大機會衝上2字頭。
內地房地產股個別發展，上市大半個月嘅瑞安房地產（272）個勢愈來愈靚，收5.94元，升3仙，芬佬話佢嘅貨源已開始歸邊，短線可衝破上市後6.33高位，向7元大關進發。
可炒落後
瑞房同世茂房地產（813）一樣，主力都係在華東地區發展，世茂噚日上到9.68元，再創上市後新高，比上市價6.25元高出54.8%！
瑞房發售價5.35元，現時股價只係上升11%，只要追番世茂一半嘅升幅（24%），瑞房股價已可見6.63元；打個75折，升40%，股價更可見7.49元。
瑞房可開發建築面積超過810萬方米，主要係在大城市市中心區發展中高檔住宅、商廈及綜合性大型項目，06年（12月年結）預測PE14.5倍，比大型地產股平均PE20倍為低。
郭兆誠