蒙嘉慧跟鄭伊健發展「蒙麵戀」後，二人的工作不但沒有影響，反而接踵而來，而一向予人不思進取的伊健，近日一反常態專心工作，昨日他出席記者會時，表示將離港三、四個月拍攝劇集，但強調仍會發展愛情，似向蒙嘉慧派定心丸。
蒙嘉慧與歐陽震華（Bobby）昨日到中環出席「商業軟件認證計劃及打擊公司使用盜版軟件獎賞計劃」啓動儀式，二人獲委為正版軟件先鋒，並接受工商及科技局局長王永平頒發感謝狀。
被窒多次
Bobby在活動儀式完畢後，即回復鬼馬本色，更以鄭伊健戲弄蒙嘉慧。蒙嘉慧被問到今年無綫台慶，看好誰奪得最佳男主角獎時，她即識趣地指看好Bobby，又謂最喜歡跟Bobby做情侶檔，但Bobby卻說：「佢喺我面前至咁講之嘛，點解唔係睇好鄭伊健？佢冇份㗎咩？佢唔係有部《隨時候命》收視好好咩？」轉頭Bobby又當着蒙嘉慧面前說：「乜你唔係睇好嗰部《隨時候命》呀？」蒙嘉慧即不甘示弱駁嘴說：「係呀，我睇好《隨時候命》嘅黎諾懿嘛！」
提到盜版問題，Bobby說：「我曾經拍過部20集大陸劇，點知我有個朋友喺大陸買到隻電影版，係有人將20集剪成一部電影拎出去賣，我覺得打擊盜版要由公民教育做起。」
夥拍小春
至於鄭伊健，他昨日跟黃凱芹和關錦鵬等到尖沙嘴出席一揚聲器品牌的周年活動，伊健透露稍後會剃光頭，準備下月到內地拍攝電視劇《霍元甲》，他說：「套劇會有陳小春一齊演出，都有好幾年冇合作拍片，大約會留喺當地三至四個月，要明年先返到香港。」
問會否阻礙「蒙麵戀」發展時，伊健笑說：「咁都要發展事業㗎，喺當地冇得打羽毛球，咪同小春兩個光頭佬打保齡球囉，或者出年返香港時斷咗，咪有段好料畀你哋囉，我話斷斷續續（發展）啫。」他表示聖誕節跟元旦未必有機會返港，更強調目前以事業為重。黃凱芹則表示剛完成三場跟管弦樂團合作開的演唱會，所以搞搞新意思將頭髮染成紅色。
採訪：魯萍、何永寧
攝影：魯萍、陳俊強
