鞏俐同張藝謀分手已經11年，唔講唔知，原來佢哋分手之前曾有一個約定，可惜足足遲咗14年先至做到。
張藝謀個老拍檔張偉平，噚日喺自己個網誌（ http://blog.sina.com.cn/u/4b22cecf010006d1）發表一篇名為「緣起．她回來了」嘅文章，大爆鞏俐同「老謀子」張藝謀嘅秘密，佢話：「92年春，42歲的張藝謀想讓27歲的鞏俐演一次女皇，他們在長城許願。張藝謀說，這個女皇只能是武則天，這個武則天只有鞏俐能演的更精采，這個武則天也只有張藝謀能導的更有感覺。」可惜最後《武則天》呢部戲開唔成，冇耐兩人仲分咗手。
對舊愛情深義重
鞏俐呢個女皇夢，要等到兩人合作拍攝《滿城盡帶黃金甲》先至完成，當時老謀子曾經同張偉平講過：「人都是這樣，自己所缺少的，便滿懷希望地去攫取，並對之寄託着深深的眷戀。」睇嚟佢對舊愛依然有好深感情。
張偉平仲話，分手之後，一次老謀子同鞏俐去康城影展做宣傳，有記者問到佢兩個會唔會再合作時，老謀子冇答，鞏俐就喊咗出嚟。到00年，老謀子導演、新一代「謀女郎」章子怡主演電影《我的父親母親》喺柏林影展贏得銀熊獎，頒獎嘉賓係鞏俐。老謀子上台領獎時，章子怡突然跟埋上台，搞到老謀子好尷尬咁遞個獎畀佢。馮仁昭都聽過話老謀子事後好嬲章子怡，因為佢事前已經知道係鞏俐頒獎，所以老早吩咐章子怡唔好上台，但佢梗係冇聽啦！
