之前有研究顯示着紅衫球隊表現不如對手，因為紅色容易挑起對方戰意。無巧不成話，前晚巴塞隆拿作客0:2負皇家馬德里，轉戴鮮紅色頭帶嘅朗拿甸奴表現不堪入目，呢鋪真係「紅」出禍喇！
記得上季作客班拿比奴，「細哨」個人表演入兩球，連敵對嘅皇馬球迷都起立鼓掌致敬。「細哨」不斷換頭帶博轉運，今場索性由上次輸畀車仔嘅深紅色，改戴鮮紅色，點知成場波都係失誤頻頻。
根據統計，賽後被西班牙《世界報》評分得5分嘅「細哨」，全場20次被對手搶甩波，難怪成場波冇晒笑容，我求大客睇住佢成名，都從未見過好似今場咁暴躁，賽後仲叫救命咁話好掛住受傷嘅伊度奧。
紅色刺激對方後衞
其實，西班牙傳統鬥牛士都用紅布來刺激蠻牛，而之前科學研究亦話紅衫容易刺激對手，從而提高敵方表現；今場沙治奧拉莫斯等皇馬後衞見到紅頭帶嘅「細哨」就搏命鏟，同上季得個企字好唔同，「細哨」下場波都係戴番黑色頭帶喇！
「細哨」亦毋須咁迷信，現時成隊波陷入低潮，仲黑到射極都唔入，唔關佢個人嘅事；前面冇伊度奧撞牆配合，佢冇態不如低調啲，戴紅頭帶盞俾人針對嘅啫！
「人紅就話戴紅色嘢啫，『細哨』呢排咁黑就唔好戴紅頭帶咁高調喇！結果對皇馬場波俾人嘜到冇晒符，下場波都係戴番黑色頭帶好過喇！」