何謂老字號？能夠由香港開埠初期屹立至今都算嘞啩？元朗「學記麵家」就係其中一間。採訪當日，老闆陳祥發同開舖功臣阿爹阿娘一齊出席，兩老好精神，一講往事就收唔到口，陳爸爸話：「四幾年呢度都仲係鄉村地方，我係潮州人，學識打魚蛋包雲吞，咪每日手打魚蛋包雲吞，擔住擔挑周街賣囉，聽到邊度有打牌聲就去邊度擺檔㗎喇。嗰陣成個元朗得兩個衞生幫辦，擺街唔單只無事，佢哋仲幫襯番我轉頭㖭。」
陳祥發四兄弟姊妹，𠵱家舖頭有家姐英姐同班老夥計幫手，佢笑住話：「我都幾樂意接手間舖，可能自己都鍾意食啦，唔覺呢行辛苦，唔鍾意做就唔會做咁耐喇。」開舖咁耐，政府政策轉過N次，經營難唔難？「都困難㗎，惟有自己變囉，70年代，我哋開始賣手打牛丸，用新鮮牛肉做，幾賣得㗎；80年代，香港經濟起飛，我哋都改用機器打，嗰時大家樂推出過燒烤包，唔係扒就係雞翼，都係我教佢哋落牛丸之嘛。之後好多行家都用冰鮮牛肉打牛丸，我哋唔夠爭，就放棄咗喇。」不過好嘢實有人撐，𠵱家佢哋唔單只進駐太古城Foodcourt，仲考慮發展到大陸，果然夠班。
記者：蘇振鵬
攝影：陳偉強
牛沙瓜河$13
牛沙瓜即牛嘅第四個胃，出面好少有得食。形狀扁平，外層脆脆哋內層黐住極少脂肪，口感帶軟，散發住滷水同牛膏甘香。
牛腩河$13
牛腩份量夠多，夠腍身，秘製滷水汁加入少量當歸，香味傳到隔籬街都聞到，食落滷水味份外突出，好味到我連湯都飲埋。
學記麵家（24420903）
地址：元朗擊壤路熟食巿場地下1號