香港、北京、巴黎、紐約、東京、首爾嘅警察樂隊，噚日齊集尖沙嘴海旁夾band，吸引咗超過800個市民同遊客圍觀。首先出場嘅香港隊，一開始就表演首本名曲「大丈夫」，唔少香港市民都拍爛手掌。之後又大玩派禮物，仲邀請台下嘅小朋友做指揮，聽眾大叫encore。
緊接法國出場嘅首爾特別市地方警察廳樂隊就着上民族服裝，大跳辮子舞。紐約市警察音樂隊成員就最有特色，佢哋身材好似倒模咁，人人有個大肚腩，不過玩起音樂嚟勁度十足。一出場就吹番首TheMagnificentSeven（萬寶路廣告歌），家陣禁煙條例搞到一鑊泡，相信唔少香港人聽到都會有共鳴。
壓軸出場嘅東京警視廳音樂隊就最吸引，佢哋有隊女子舞旗隊，隨住音樂跳舞同拋動手上嘅旗幟，好似啦啦隊咁落力。唔少觀眾都拍爛手掌。音樂會反應熱烈，唯一美中不足嘅係，唔少企喺前排嘅觀眾，為咗自己睇show而唔肯坐低，令到唔少後排觀眾要不斷大叫坐低、中國人守吓秩序啦，都幾失禮。
