搞能源同埋採擴係近期最熱門嘅上市公司活動，其中日本亞太（603）計劃轉型搞能源，項目都未落實就已經先行配股集資，仲通過咗改名，本周四開始正式用新名中油燃氣。類似名稱嘅上市公司計有中國燃氣（384）、中民燃氣（681）、中油香港（135）等等，要寫公司簡稱，分分鐘搞亂晒呢幾間公司。
上市公司如果往績好，幾大都唔會改名，以免股民唔記得，相反頻頻改名，有乜用意，應該唔難明白。
仲有一間搞轉型嘅漢寶集團（228），上周宣布計劃改名做中國能源開發，公司年中計劃以51億元收購蒙古一個「估值」400億元嘅煤礦，呢單投資波折重重，未知是否繼續進行。唔使幾個月，公司又以1000萬元前期定金收購澳門天然氣項目。據報澳門天然氣同中石化（386）計劃於珠海建天然氣接收站，但投資要逾百億元，漢寶如何參與係一個謎。
柬埔寨賭股金界控股（3918）上周四首日掛牌升兩成，周五再升近兩成至2.05元，全日見有歐資行掛牌大手掃貨，成交近4億股，拍得住掛牌首日嘅4.33億股。市傳有個基金攞唔足配售股份，指明要等佢上市之後買齊貨，即管睇睇交易所資料呢幾日會唔會出現持貨逾5%要申報嘅主要股東？
歐陽風