曾經係基金愛股嘅福田實業（420），呢兩三年傷盡股民心，股價由03年8月高位7.95元，插到今年9月最低1.93元。經過漫長黑暗日子，隻股上星期終於見起色，上星期五大升6.2%，收2.39元，有14仙進賬。
「香港討論區」內，唔少網友討論呢隻股，makamaka對佢充滿憧憬：「第二隻179，見底急反彈？」
rupat比較心水清：「主席於2.0至2.3增持好多次，呢個pricerange入比較安全。」
mch411嘅評語都正面：「起碼呢間公司做正經生意，有穩定收益，好過啲概念股、科幻股。」
福田係全球最大嘅圓筒針織布生產商之一，但近年原材料價格上漲，加上利率持續上調，搞到成本劇增，盈利受損。經過咁多年低潮，福田股價已將不利因素反映得七七八八，里昂上星期三發表報告，指長遠難對福田之行業前景持正面看法，但中短期而言，該股卻具上升潛力，建議投資者伺機買入。
睇技術走勢，隻股9月1號自1.93元低位反彈，受制於2.40元回落，喺2蚊搵到支持，之後以小圓底兜上，上星期一至五，成交一日多過一日，星期五成交股數更高達21球，一舉撐穿上次反彈高位2.40元，唔似係虛火。
再睇周線圖，MACD底背馳，MACD線上破訊號線，現熊牛訊號，加埋大陽燭升穿保歷加通道中軸，係咁意博佢上番保歷加通道頂2.80元左右，都可以執17%。睇上星期咁嘅成交，水位應該唔止咁小。如果見有回吐，可以諗吓，跌穿日線圖保歷加通道中軸2.10元止蝕。
余文