今個周末，孫柏文兄再次變身白銀戰士，四周圍搵投資機會，佢臨走之前，借咗隻金手指畀我高明輝一日咁多。
上個星期，思哲兄話she.com要升為2.0版本，定位做「反擊港男基地」先至有機會搞大佢嚟做。我就覺得，she.com入面最大嘅資產asset，就係入面嗰班港女。就好似YouTube入面最煞食嘅，就係佢哋源源不絕嘅短片。如果變身做2.0，以港女養港女，分分鐘有機會衝出香港㖭呀！
點解咁講？因為she.com嘅觀眾係「Young、Hip」嘅香港女性，咁啱我早排睇娛樂版，發現呢類港女有好嚴重嘅短缺。事緣「詠伊戀」兩位主角分道揚鑣之後，女方即刻可以同佢位法國朋友多啲了解；男方依然係以結識港女為目標，可以話係飛唔出香港。就算英文叻到好似「唔係好識睇中文」嘅陳冠希，最後都係識番港女算數。由此可知，香港女性只要增值addvalue（例如學吓啲啲咁多英文），即刻可以衝出香港，而限於港男英文半桶水嘅永恒真理，「媾鬼妹」只係得啖笑，北上又驚被人呃嘅情況下，追番港女似乎係唯一出路。
同樣道理，she.com如果升級到2.0模式，再加番個英文版，等外國嘅朋友有一個比較集中嘅地方去了解、結識香港女仔。外國嘅朋友「搵舊片，上YouTube」之餘，亦可以「識港女，上she.com」，一個唔該，隨時變做「全球媾港女基地」。至於會唔會成為Google下一個併購目標，就好視乎港女嘅國際市場價值。
李國章「曲線反曾」？
講完港女，我就要拎孫兄走之前留低嗰隻金手指，用嚟篤爆李國章嘅謬論。
李局長話，唔可以用公帑嚟俾人牟利。照咁講，局長唔係好同意《施政報告》入面九成以上嘅內容，例如成立電影局、畀錢啲司機換環保車、資助香港設計中心等等。跟住佢又話，如果向私立幼稚園提供資助，可能會俾人話官商勾結。連區區輿論都驚，咁係咪當佢波士句「強政勵治」流嘅？
因乜事佢要去得咁盡呢？江湖傳聞，下任教統局局長會由一名資深左派人士揸弗。煲呔個「拉票報告」就話功得圓滿啫，下面啲局長隨時得番8個月貨仔，𠵱家都仲妾身未明。阿瑟王唔會因為咁而嬲咗煲呔，扮挺學券，其實借啲意「曲線反曾」啩？