中資股氣勢如虹，H指創下9年新高，金融同保險股一浪高過一浪，而多隻傳統紅籌股，例如光大控股（165）同華潤創業（291）等，都創出近幾年高位。光控受光大銀行注資後上市消息刺激，股價在3日內由5.50元急升上7元，大升27%。
中資股開展大升浪，強者先行，落後者好快會接力而上。搵對象，搵光控第2，有一隻，就係銀建國際（171）。銀建同光控有共同點，就係1.大家都係傳統紅籌股，呢期輪到呢類股份被追捧；2.就係大家都做金融業務，呢期金融保險股就升到你唔信。
不過，光控股價創出6年多來新高，銀建在04年底見過4.50元（除息計）後，今個月就跌到1.84元先反彈，兩者相比，銀建表現醜死，但物極必反，銀建已見底，一跌完，就會急彈。
再睇，光控往績PE37.2倍，銀建4.8倍，雖然現年度業績會此長彼消，但銀建預測PE仍只係5至6倍，股價確實係跌過龍，大偏低。近日銀建由低位回升，聽聞係有大行認為佢抵買，已大手在市場收集，目標價2.80元，即係有40%升幅。
睇好銀建，仲有幾個理由：
認購建行中行獲利豐
1.銀建認購建行（939）獲厚利，中行（3988）上市時又以3元認購2.6億股，賬面獲利甚豐。
2.持有12%的貴州同濟堂安排在美國上市，市值料達4億美元，銀建成本1億元人民幣，估計可大賺2.6億元人民幣。
3.除處理資產包外，銀建仲有地產、投資同基建業務，06年（12月年結）唔計特殊項目嘅盈利估約6.2億元，每股盈利34仙，預測PE只係5.8倍。
仲有，銀建大股東係直屬中國國務院嘅信達（持29.84%）同美國花旗集團（持18.22%），後者平均入股價2.77元。股東背景咁勁，有一天若話成功買咗間銀行（年幾前已傳過），銀建就會大翻身。
郭兆誠