俾國資委由華潤調去中糧，刻意收埋自己兩年嘅寧高寧，前日終於出關，之不過唔係見香港傳媒，而係響北京新地頭同內地行家吹風，佢除咗拋出個100億人民幣新能源戰略（主要係用玉米、木薯提煉生物乙醇咁啦）之外，仲話為實行有限度多元化，會將戰線拉長，今後只做5至8樣回報最好嘅嘢，即係咩？
寧生話，嚟緊5年，中糧只會做糧食流通、品牌食品、生化能源、地產酒店、金融投資等8個範圍，用5年時間將中糧發展為中國業內最強大嘅企業，10年成為全球最富進取精神、最優秀嘅企業喎。
嘩，目標定得咁高，做唔做到就唔知，但華華覺得呢張清單範圍太闊囉。
實現目標呢樣嘢有排搞，但中糧個公司logo就可以好快改變，寧生為咗襯番新中糧，整咗個新標誌（見圖），主體六角圖案由天、地、生命三部份，加一點陽光構成，意念係尊重及善用自然，人與自然、人與人和諧相處……唔講都幻想唔到㖭。