不經不覺又放完暑假。oh！sorry，差啲醒唔起我打緊NBA，唔係讀緊書；不過對我來說都係一樣，因為我根本唔想開學或者開波，最好一路都放暑假。你唔好睇我懶懶閒，其實休季呢幾個月我都有練波，我話晒都係「佢」親自欽點嘅高中狀元，點都有少少自尊嘅！唔通想好似幾年前咁，超速駕駛之後驚俾佢鬧，嚇到呆若木雞咁企喺交通警旁邊，俾記者笑咗幾年咩！
加盟湖人逃離「神」之魔掌
佢係邊個咁特殊？唔講得㗎！佢勢力咁大，又多線眼，講佢啲衰嘢死梗。上次安東尼扭吓計，都俾「佢」省咗成粒鐘；我呢啲蛋散講佢壞話，分分鐘以後波都冇得打！
上季加盟湖人，都算係我呢生人最成功的一件事。之前有人笑我不自量力，巫師同我續約的時候居然sayno；之但係要喺佢魔掌，sorry，係響「神」掌之下打波，多多錢都唔肯啦！
家陣喺湖人不知幾開心，舊時細個唔識嘢衰過性侵犯，好彩呢度個大哥拜恩又衰過呢味，所以大家對呢家嘢睇得不知幾開；呀！仲有，上年選咗拜林返嚟，大家就將希望放晒落佢度，而唔再不停迫我打好啲，練波嗰時都逍遙啲。
好多人話我成7呎高，身手又咁靈活，認真打的話一定可以橫掃聯盟；又話我𠵱家遭遇十足十當年謝美奧尼爾，喺拓荒者等待破繭而出。其實大家真係唔明我為人，有心打的話，我一早就幫湖人贏總冠軍啦！對上一次認真打波？我諗都要數番打麥當勞全美高中明星賽，話晒第一次上電視嘛！𠵱家同Kobe一隊，我搶吓籃板，守吓波又一day，分又唔使點攞，不知幾輕鬆；最好佢場場都入81分，等我可以游吓就算，起碼唔使成日俾積遜教練話我走錯位。佢又唔諗吓個三角戰術咁複雜，鬼識咩！
打兩年好波博簽fatcontract
早幾個禮拜收到好多fansemail同我講生日快樂（10月3日），係呀！今年我24歲喇；加上今個暑假，我哋成班隊友去完奧當個仔嘅喪禮，見多咗生離死別，自己好似大個咗。至於生日願望……，梗係好好打埋呢兩年，博大老細Buss先生同我簽張fatcontract啦！到時我大把錢，點玩都得喇！
文：仙道彬