供咗6年強積金，若然當中冇試過失業，都應該累積咗幾十萬元，係咪心郁郁想攞啲出嚟使呢？不過，AXA財富管理部主管唐博禮（圖）說，強積金係一項退休保障，所以唔係話攞就攞，要符合好多條件先得㗎！
乜嘢情況下可以取用強積金？
●當你年屆65歲可以「榮休」時
●年屆60歲及提早退休嘅員工
●永久離開香港，不過用呢個原因取用強積金，一生只有一次機會。
●永久喪失工作能力
●身故
●若你係小額結餘賬戶，累算權益少於5000元，同時喺過去一年沒有向/不需向任何強積金計劃作強制性供款，而在其他強積金計劃亦沒有累算權益，亦沒有打算在可見將來受僱或自僱。
世事無絕對，若你符合上述條件，已經長歎唔使做，兼攞埋份強積金，突然「高薪厚祿」嘅機會拍門搵你，咁份強積金又點計呢？
雖然話退休，但香港人咁精靈，唔少人退休之後都大把人搶，唔信睇吓我哋警隊一哥。若果年滿60歲，或選擇提早退休嘅人士，在退休並支取了強積金後，重投工作崗位，成為受薪僱員，佢哋嘅強積金會重新開始，但這次供款便須在65歲時才能取回。
如果你已移民外國，但被大企業高薪「挖」回港工作，若你是以「香港永久居民」身份回流，強積金戶口與供款會重新開始，你同樣要在65歲時才能取回強積金，而且不能再以「永久離開香港」為由提取供款。
若你是以「外國公民」身份回流，則要視乎個別僱員合約，不能一概而論，個別外地專才是不需在香港強積金戶口供款的。
若不幸真的喪失工作能力要取用強積金，就要出示醫療證明。若要提取強積金，需要向強積金管理局提出申請，款項會是一筆過提取。