有冇發覺個雪櫃其實係雜物櫃，去到超市見到乜嘢都買番屋企，食唔晒放晒入雪櫃，特別係生果。噚日同撻着咗無幾耐嘅男友Mike，去到九龍城永富食品買生果，見到一排排掛起嘅香蕉，成日亂咁諗嘢嘅Mike問：「點解香蕉都係掛起，唔係放喺雪櫃嘅？」又係喎。p(~o~)q
老闆陳錦輝話，香蕉放喺雪櫃會好快變熟同埋變黑，芒果、蓮霧同天桃都唔係咁適合放入雪櫃：「除咗雪一陣即時食，芒果等放入雪櫃會好易壞。」
唓！生果檔老闆咁講啫，都係問吓啲學者穩陣啲；中文大學食品及營養科學課程教授黃蔭成話，大部份生果都可以放喺雪櫃保鮮，因為低溫會減慢新陳代謝，生果無咁易變得太熟，細菌亦無咁易滋生。不過，部份生果，例如香蕉，因為對低溫比較敏感，所以放喺雪櫃會變得黑黑咁。佢仲話，草菇都係一樣，屬於對低溫敏感嘅植物，都唔係咁適合放入雪櫃保鮮。
之前都講過，香蕉放得耐會有梅花點，有時仲好黑㖭。但如果冇變味，只係嫌賣相唔好，其實都可以用嚟榨汁㗎。(o^_^o)
逢周一至周四刊出