雖然政府近年不斷陰亁港台，但港台都仲拍到《傑出華人系列》呢啲優質節目，最驚係連呢個空間都開始被蠶食。八方聽聞，港台高層之前開會，傾吓今年拍乜傑出華人，有人提議要拍陳馮富珍，仲要下面啲導演度吓點拍。雖然國家同煲呔𠵱家力撐雞珍，但雞珍有幾傑出，有冇資格做傑出華人，唔使講，公道自在人心啦！
八方噚晚問過港台教育電視台長施永遠，佢承認有傾過呢單嘢，但強調呢個只係提名階段，未最後拍板，而且個新一輯傑出華人最快明年先播。八方相信啲港台高層，未至於自毀長城，整衰傑出華人系列同港台個朵。唔知又係唔係邊個左派或者高官，叫港台配合支持雞珍嘅國策，幫雞珍洗吓底。不過，好彩港台嘅導演個個風骨錚錚，全部SayNo唔拍，令傑出雞珍極可能胎死腹中，挽救「傑出華人系列」個金漆招牌。
禽流感沙士劣績可見
如果下輯傑出華人真係有雞珍份，八方肯定冇眼睇，睇怕到時啲沙士家屬個個要上港台示威，抗議港台扭曲沙士歷史，為雞珍塗脂抹粉，愧對沙士受害人。所以呢班堅決唔拍嘅導演，先至係真正愛港台，表現咗港台嘅獨立自主，如果有個導演為咗兩餐、捱義氣幫雞珍拍宣傳片，到時大家真係要一齊哀悼港台。
提議要拍雞珍嘅人，諗嘢真係唔經大腦，因為真係冇可能拍到。港台以前傑出華人拍誠哥同李光耀都有爭議，但話晒佢哋一個係超級首富一個係新加坡國父，點都拍到啲勁嘢畀大家睇。
雞珍呢？做官以來，佢真係冇乜好嘢做過，大家記得佢出過鏡嘅片段，一係禽流感時話「我日日食雞」，一係就沙士嘅劣績斑斑、立法會沙士聆訊俾班議員片，做過嘅好嘢真係諗唔到，如果唔係好似日本仔咁竄改教科書，點可能拍到一集電視片，證明雞珍係傑出呀？如果真係想港台拍雞珍，不如等多十年八載，睇吓佢下半生做唔做到好嘢再講啦！