周六晚，眾人媽打李麗娟嫁女，官紳到賀，媽打笑到見牙唔見眼，成個婚禮由阿女創意籌劃，婚禮Logo按足「史密夫與史密妻」嘅格局設計，晚宴有兩人拍拖經過嘅影片同訪問，十分趣致。臨尾阿女嘅爸爸劉石佑上台演唱粵曲娛賓，估唔到好有大老倌功架，媽打仲好似fans咁上台獻花㖭！
飛哥李鵬飛坐在八方嗰圍枱，佢着套新款冇領中山裝，人清瘦咗，冇改口水多過茶嘅評論員角色，飛嫂Molly睇住飛哥套衫，笑笑口咁同八方講：「呢啲衫叫做愛國裝，佢𠵱家咁着出嚟，叫做愛國表面化！」
飛哥冇理飛嫂，繼續評論煲呔針同田大少嘅對罵恩怨，話晒大家都係前後期自由黨主席，佢自然幫田少，佢話：「田少係好直嘅人，佢話投咗畀陳鑑林就係投咗畀陳鑑林，絕對唔會講大話。我估都係大班想轉換視線，泛聯盟應該五票都投咗畀劉慧卿。仲有我相信李國寶唔會投畀劉慧卿，佢都唔鍾意卿姐嘅。」佢認為，大班咁做係要加深自由黨同煲呔的嫌隙喎。
自由黨嘅楊孝華話，當初係Anti-chamber提出民建聯可以派人出來選嘅都係田少，點會唔投民建聯，佢仲話原本要訪問澳洲，特登縮短兩日行程，就係要返嚟投票畀陳鑑林。