若論經典足球動漫，《足球小將》堪稱當中最令人津津樂道，事關戴志偉與小志強由𡃁仔時期嘅宿敵關係鬥到𠵱家歐洲相逢。唔少人仲掛住超任嗰陣嘅正爆指令玩法，𠵱家終於喺過往框框搵到新點子，唔單只全面3D化，仲變成既有動作元素，又有指令落柯打嘅系統，等你可以學原著小志強咁半場抽個波入網，爽快到痹！
文：陳福榮
經典場面跟足原著
與其話隻Game系統唔差，倒不如話佢賣點係幾乎跟足原著嚟開發。廠商搵番動畫版原班聲優重新配音，演繹番原著嘅經典場面。譬如第一場南葛對大友，後輩新田無時無刻不想挑戰志偉，咁只要兩條友走埋一齊就會有Event發生。而後來當志偉深入敵陣亦會遇上大友四人組，俾佢哋四件中後場夾擊監生搶走個波，簡直係重溫漫畫版劇情！
最印象深刻就係志偉剛學識衝力射球嗰Part，對住次藤嗰場波，話咁快就落後3比0，結果劇情規定只准你玩下半場，仲要只有兩次「餐屎」俾你衝力射球直射入網，無論畫面表達抑或戰果都同原作一模一樣。
掌握節奏出絕招
雙方對峙搶波時，又或龍門救波都要按節奏㩒掣決定是否成功，識得玩節拍遊戲《Beatmania》應該會着數少少。就以搶波為例，只要防守一方接近對方球員，就會進入爭波場面。兩邊都要喺指定時間按掣，記住唔係連按而係睇準時機逐下按合共三次，電腦便因應你按得準唔準而決定評級，由高到低為Critical、Smash、Good和Bad，掌握到下下Critical就真係次次搶贏，乜人守龍門都冇用！
絕招方面就加上指令按掣嘅規定，例如衝力射球係「╳△╳」、猛虎射球係「╳╳△」等。龍門接波方面，如果對手係用必殺技射門，咁嘅話你只要按番相應指令就能夠使用撲救絕技，雙方以鬥㩒得準為取勝原則，玩起嚟都幾刺激㗎！
獵鷹VS禿鷹
PS2呢隻《足球小將》係Bandai參考過往大受歡迎嘅指令操作而成，雖然3D化後畫面唔多靚，不過玩落勁多嘢要兼顧，根本睇唔切啲人係乜樣！盤球方面完全動作化，交波、撞牆同射波要拉個選單出嚟揀，可算混合動作及指令式玩法，當然唔少得經典射波場面啦，由最出名嘅衝力射球到猛虎射球都有，最搞鬼係新田跟松山同場較量時，禿鷹射球VS獵鷹射球，兩隻鷹都咁有氣勢，玩到機迷好鬼熱血！
我要做隊長！
假如你打爆故事模式，幫日本少年隊贏個世少盃返嚟，就可Unlock「另一個傳說」模式。即係由玩家自行設計一個角色取代志偉，擔任南葛甚至日本隊嘅隊長席位，樣貌、高矮肥瘦等任你改，仲可安排佢打唔同位置，前鋒定後衞悉隨尊便，即係以另一個角度去體驗隊長生涯。
PROFILE
遊戲類型：足球
對應機種：PS2
開發廠商：NamcoBandai
遊玩人數：1至2人
售價：約$440