大少田北俊發表文章，單挑大班鄭經翰，文筆寫得十分火猛，可讀性甚高，不過講到鄭大班與石禮謙兩人之關係，扯埋私人方面，話「據聞大班夫婦也常與石議員和他女友一同遠遊的」，則未免公私不分。政治對罵，無論誰是誰非，總之係表述自己立場，攻擊對方啫，何必將人哋嘅太太女友拉埋落水，田少唔係幾man喎！
大少戰大班，皆因劉慧卿而起。唉，如果當日田少抽籤抽中陳鑑林做財務委員會主席，可能唔會有事。𠵱家田少話明自己投票支持陳鑑林，但因兩人有二十五票對二十五票，最後由劉慧卿幸運連任，可見劉議員得到上帝之手支持。鄭大班在《信報》與《南早》為文推測田少為親政府派之「陣前起義」主謀，田少大怒，鬧番轉頭，於是我哋有好戲睇。
政治是非，與好多市民無關，只是暴露咗立法會議員之間的利益串連，利益矛盾與人事人情嘅關係。香港政治在港英管治之時，係聽港英總督話，現在係聽中央話，立法會議員只是舉手機器，對大局政策無實際影響力，又因為基本法規定之香港政制甚為畸形，議員如果唔做順民，就只能做破壞王，以爭吵為樂，大班做咗兩年議員，已覺得嘥時間，決定兩年後唔尋求連任。
上星期碰到一位老左派，佢都覺得在目前政制下，特首冇政黨支持，議員冇話事權，故此事事與政府爭吵，乃制度使然，邊位仁兄仁姐坐特首位置，民望都會滑落。佢地向中央反映，但中央一嚟唔想放棄百分百控制，二嚟覺得中國面對嘅緊急事務太多，香港走唔出如來佛五指山，怎樣也亂不起來，故此香港政制不會優先處理。無論香港人點諗都好，呢位老左派認為曾生篤定連任，中央唔想見到有人爭位產生意外，梁家傑要攞一百張選委票，絕不容易。