屯門區樓盤出名平，上車盤多的是，對於經濟能力不高，但又想置業的人士，的確可以任揀。然而，買樓開支不少，供樓閒閒哋十幾二十年，要小心計算才好作決定，免得將來後悔莫及。
網友Skypilot預計，今年底與女友儲到20萬元，每月收入共2萬元，打算購買屯門市廣場約100萬元單位，但擔心唔夠能力供樓，於是在Uwantsforum提出「我是否有能力供樓？」
若干回應建議，再儲多10萬元，夠三成首期才買，供樓會較輕鬆。Hkcityclub更以高人口脗說，「每月要供8000，若你與女友其中一個俾老細炒魷，就大檸樂！萬一甩拖，仲大煲，大把手尾跟。租住先啦，4000幾蚊（全包），𠵱家樓市咁高，坐艇坐瓜你呀……細佬。」
抱正面意見的herro7802，分享佢親身經驗，「我都係住屯門，啱啱買樓，二手嘅，80萬左右，600幾呎，月供4000，如果你唔大使，都供得起。」
記者從實際情況而言，Skypilot資金20萬，只宜以10萬做首期，餘下用作裝修及買樓雜費等，雜費包括經紀佣金1萬、律師費約5000、釐印費100蚊，以及須購買按揭保險，保費2.556萬元。不過，保費可加於借貸款項內，以現時優惠利率P（8厘）減2.8計算，利率即5.2厘，連貸款分20年攤還，月供6200餘元。
此外，記者查詢屯門市廣場市況，500方呎以下，樓價約100萬元或以下的，放盤有四五十個，有些盤仲可以望到公園及山景。
5000元以下租盤，數量較少，僅20個。雖然網友意見多多，記者也計算一番，但買不買樓，純粹個人決定，Skypilot再認真諗清楚先啦。