南方濕氣重，一杯廿四味落肚，降火祛濕。論香港歷史最悠久涼茶舖，44歲嘅「楊春雷」第三代掌門人楊文佳表示：「記憶所及，『王老吉』應該係最耐一間！不過近年轉咗做零售、批發；旺角『單眼佬涼茶』應該係九龍區最舊一間，我哋『楊春雷』就係港島區代表，前舖後居有94年歷史。」賣涼茶，係種沉默交易，幫襯嘅人自動自覺放低$5，攞起就飲，楊文佳聲都唔聲，就喺隔籬洗碗盆密密洗又密密斟，「係呀，呢度好多都係熟客兼老街坊。有個客呀，幫襯咗我幾年，大家關係只係斟茶、飲茶、放低$5，到𠵱家我都未知佢叫乜嘢名。」
60年代末係香港涼茶舖最火紅年代，楊文佳憶述：「嗰個年頭，涼茶舖係好多人嘅消閒聚腳地；當年唔係家家戶戶都有電視機，老規矩係每睇半個鐘頭，就會熄電視、再派茶，原理就好似收入場費一樣。」灣仔區重建計劃最影響「楊春雷」嘅前景，拆吓拆吓，唔經唔覺已經拆到去隔籬舖，「40幾年前，我阿爸嗰代都經歷過一次，當年政府就原址安置，所以呢個舖位同『楊春雷』一樣有94年歷史，如果到我呢代要再經歷一次，相信最多係補錢了事，真係好難再做落去囉。沙士前都諗過加價，但時間唔啱，𠵱家點解唔加價？你覺得香港經濟好好咩？」唉！香港，真係有錢富商玩晒，甚麼甚麼企業就獲頒甚麼甚麼香港品牌，灣仔呢間近百年老舖呢，就粒聲都無，我好希望，唔好拆到過嚟。記者：朱崇德
攝影：伍慶泉
楊春雷特效涼茶
地址：灣仔春園街29號地下